গল্ফীৰ ডায়েৰি

গল্ফীৰ ডায়েৰি:

সিদিনা ফটা লেতেৰা ১০ টকীয়া ৫ টা ৫০০ টকাৰ খুচুৰাৰ মাজৰ পৰা ওলাল৷বীৰুৱে ক’লে – “চলিব চলিব ,এতিয়া ফটা-চিতা চব চলিব’”৷

হাৱাই চপ্পল কিনিবলৈ বাটা দোকানত সোমালোঁ৷ চপ্পলযোৰৰ দাম ২০০ টকা৷মই ২০০ টকাৰ খুচুৰাৰ মাজত এটা ফটা ১০ টকীয়া ভৰাই দিলোঁ৷পিছে দোকানৰ চেঙেলীয়া চেলচমেনটোৱে গণি গণি ফটা ১০ টকীয়াটো উদ্ধাৰ কৰি মোক ঘূৰাই দিলে৷মই কপাল থূপাই তাক ক’লো –“দেখা নাই খুচুৰাৰ কিমান আকাল পৰিছে দেশত?১০ টকাটো তুমি ল’ব লাগিব!” সি মুখ ফুলাই কৈ উঠিল –“নলওঁ,যাৰ পৰা আনিছিল তেওঁক দি দিয়ক গৈ,আমাক কিয় দিছে?” মই জোৰ দি ক’লো –“মই ল’ব পাৰো যদি তুমি কিয় ল’ব নোৱাৰিবা?” ল’ৰাটোৱেও সমানে জোৰ দি ক’লে—“আপুনি লৈছে বুলিয়েই যে মই ল’ম ক’ত লিখা আছে?” মই মোৰ খংটো উতলাই চালোঁ – “হুঁ,ফটা ১০ টকা নুলোৱা, ইডিয়ট ননচেন্স,ন’ কমন চেন্স”
“আপুনি হে ন’ কমনচেন্স!!” – ল’ৰাটোৱে সমান খঙেৰে চকু ডাঙৰ কৰি কৈ উঠিল ৷শেষত ৰণত জিকিব নোৱাৰি নতুন ১০ টকাটো দি ফটাটো উভতাই ল’লো৷বেচেৰা তাৰ গাতনো কি দোষ!এনেয়ে এখুন্দা লাগি চালোঁ আৰু!