Sunday, 29 March 2015

গল্ফীৰ ডায়েৰী

গল্ফীৰ ডায়েৰী
মাজনী বাইদেউহঁতৰ ঘৰৰ চোতালত চাৰিবছৰীয়া বাবলু আৰু পিকলু খেলি আছিল ৷ বাবলুৱে পিকলুৰ কাণত আৰু পিকলুৱে বাবলুৰ কাণত চিঁয়ৰ মৰা মৰি খেলিছিল ৷ মাজনী বাইদেৱে সিহঁত দুটাৰ কাণ্ড দেখি ভয় খালে -- সৰ্বনাশ! কাৰ কাণৰ পৰ্দা ফাটে ঠিক নাই ! দুয়োটাকে ধৰি লৈ তাই বুজোৱা আৰম্ভ কৰি দিলে -- " বাবলু,পিকলু আনৰ কাণত চিঁয়ৰিব নাপায় , নিজৰ কাণতো নিচিঁয়ৰিবা দেই ....." মাজনী বাইদেৱে কোৱা কথাখিনি বীৰুৱে শুনি আছিল ৷ বীৰুৱে ক'লে -- "অ' মাজনী বাইদেউ! নিজৰ কাণত নিজে কেনেকৈ চিয়ঁৰিব পাৰে মোক শিকাই দিবাচোন...."
মাজনী বাইদেৱে তেতিয়াহে গম পালে তাই কি কয় পেলালে, নিজৰ কথাত নিজে সশব্দে হাঁহি উঠিল ৷

গল্ফীৰ ডায়েৰী

গল্ফীৰ ডায়েৰী
বীৰু কলকাতা গৈছিল ৷ আজি মোক লগ পাই ক’লে—“ এইবাৰ ট্ৰেইনত কি হৈছিল জানা?”
মই বুলো “ কি হৈছিল ?”
বীৰুৱে হা: হা: কৈ হাঁহি মোক ক’লে – “পকেটমাৰনী এজনী লগ পাইছিলো নহয়!”
মই আচৰিত হৈ সুধিলো – “কেনেকৈ?”
সি ক’লে – “ মই পেপাৰ চাই আছিলো, তেনেতে এজনী ধুনীয়া ছোৱালী আহি মোৰ কাষত বহিল ৷ মই পিছে তাইক পাট্টা নিদি পেপাৰ পঢ়াত মন দিলো ৷ তাই লাহেকৈ মোৰ পেন্টৰ পকেটৰ পৰা ৱালেট টো লৈ নিজৰ বেগত ভৰালে , মই সকলোবোৰ গম পাইও নজনা ভাও ধৰি থাকিলো ৷ তাৰপিছত কি হ’ল জানা?”
মই সুধিলো –“কি হ’ল???”
বীৰুৱে ক’লে—“ টি.টি আহিল নহয়! মোৰ পৰা টিকট বিচাৰিলে৷ মই ছোৱালীজনীলৈ দেখুৱাই ক’লো “মিছেছৰ হাতত” আছে ৷ টিটিয়ে এইবাৰ ছোৱালীজনীৰ পৰা টিকট খুজিলে,তাই মোলৈ ঘোপাকৈ চালে আৰু লগে লগে মোক মোৰ ৱালেটটো ঘূৰাই দিলে ৷ মই ৱালেট টো পাই গ’লো ! হা: হা: হা: ৷ দেখিছা মোৰ বুদ্ধি কিমান?”
মই তালৈ পেন্দোৱাকৈ চাই ক’লো—“ঢপেই দিছা নে সঁচাই কৈছা ধৰিব পৰা নাই দেই ৷ বাৰু যি কৰিলা ভালেই কৰিলা ৷”
Like · Comment ·  · 255

গল্ফীৰ ডায়েৰী

গল্ফীৰ ডায়েৰী
২৫ জানুৱাৰী’২০১২
বীৰ, অৰূপ আৰু হীম তিনিওটা খুব ভাল বন্ধু ৷ বীৰ আৰু অৰূপ যিমান টেঙৰ হীম কিন্তু সিমান টেঙৰ নহয়, এই কথা বীৰ আৰু অৰূপে হীমৰ বিষয়ে ভাবে ৷ এদিন তিনিওটাই ১০০ টকাকৈ দি মিছা কথা কোৱা প্ৰতিযোগিতা পাতিলে ৷ যি জনে আটাইতকৈ বেছি মিছা কথা ক’ব পাৰিব সেইজনে ৩০০ টকা পুৰষ্কাৰ পাব’ ৷
প্ৰথমে বীৰে আৰম্ভ কৰিলে – “ মই তেতিয়া সাত বছৰীয়া ৷ এদিন ডিচেম্বৰ মাহত মামাৰ ঘৰলৈ বুলি থাকিবলৈ গ’লো ৷ আমাৰ মামাৰ ঘৰটো আকৌ নদীৰ দাঁতিত ৷ প্ৰথম ৰাতি মোৰ ৩ বজাত পায়খানা কৰিব লাগিল ৷ মই পায়খানা কৰিবৰ বাবে ঘৰৰ বাহিৰ ওলালো ৷ পিছে বাহিৰ ওলাই দেখিলো পায়খানাত মানুহৰ লানি, মোৰ পিছে জোৰকৈ লাগিছিল সেয়েহে মই নদীৰ পাৰলৈ দৌৰ মাৰিলো ৷ নদীৰ পাৰত বহি আছোঁ তেনেতে দেখিলো এটা শিল পানীত ভাঁহি আহিছে ৷ লাহে লাহে শিলটো মোৰ ওচৰ পালেহি ৷ মই দেখিলো, শিলটোৰ ওপৰত এটা বান্দৰ বহি আছে আৰু সি চিগাৰেট টানি আছে ৷ মই ভয়তে ল’ৰাল’ৰিকৈ কামফেৰা কৰি ঘৰ সোমালো ৷”
এইবাৰ অৰূপে তাৰ মিছা কথাৰ কাহিনী আৰম্ভ কৰিলে --- “ মই ৭ বছৰীয়া থাকোঁতে ককাৰ ঘৰলৈ গৈছিলোঁ ৷ মই দেখিলো যে ককাই চোতালতে ধান সিঁচিছে ৷ মই ককাৰ ঘৰত ১৫ দিন আছিলোঁ ৷ ১৫ দিনতে ধান পকি সৰোঁ সৰোঁ ৷ সেয়ে ককাই ময়ে ধান কাটিবলৈ সোমালোঁ ৷ ধাননীত ২০ টা মান ছাগলী আছিল ৷ আমি ধান কাটোতে ছাগলীৰ মূৰ কাট খাইছিল ৷ আমি ছাগলী কেইটা ওলিয়াই আনি ধান কাটি শেষ কৰিলোঁ আৰু দুদিনতে ঘৰৰ সকলোৱে ২০ টা ছাগলী খাই শেষ কৰিলোঁ ৷”
সিহঁত দুটাৰ কথা হীমে শুনি আছিল ৷ বীৰ আৰু অৰূপে হীমকো সিহঁতৰ দৰে মিছা কাহিনী ক’বলৈ ক’লে ৷ হীমে ক’লে—
“মই তহঁতৰ দৰে ইমান ধুনীয়াকৈ ক’ব নোৱাৰিম, কিন্তু এটা কাহিনী ক’ম, সঁচা কাহিনীয়েই ৷”
সিহঁত দুটাই ক’লে—“অঁ, ক’চোন বাৰু …”
হীমে আৰম্ভ কৰিলে – “ মই যিমানদূৰ জানো মোৰ দেউতাৰ লগত তহঁত দুটাৰ দেউতা ভাল বন্ধু আছিল ৷ পিছে এদিন বীৰৰ দেউতাই মোৰ মাৰ পৰা ২ তুলা সোনৰ চেইনডাল খুজি বেলেগ ডিজাইনত বনাই দিম বুলি লৈ গৈছিল, কিন্তু আজিলৈকে ঘূৰাই নিদিলে ৷”
হীমৰ কথা শুনি বীৰে হীমলৈ ঘোপাকৈ চালে ৷ হীমে আকৌ আৰম্ভ কৰিলে –“ আন এদিন অৰূপৰ দেউতাই মোৰ দেউতাৰ পৰা ১০,০০০ টকা ধাৰলৈ লৈছিল, কিন্তু আজিলৈকে ঘূৰাই পোৱা নাই ৷”
হীমৰ কথাশুনি এইবাৰ অৰূপৰ কঁপাল কোচ খালে ৷
বীৰ আৰু অৰূপে একেলগে চিঁয়ৰি উঠিল –“তই মিছা কথা কৈছ’?”
হীমে লাহেকৈ ক’লে – “মই সঁচা কথাই কৈছো”৷
বীৰ আৰু অৰূপ –“ নহয়, তই মিছা কথা কৈছ”
হীমে ক’লে—“হে হে, মই যেতিয়া মিছা কথাই ক’লো তেন্তে ৩০০ টকাটো মোৰ ৷”
বীৰ আৰু অৰূপে তেতিয়াহে কথাটো উপলব্ধি কৰিলে আৰু হীমক ৩০০ টকা দি পুৰষ্কৃত কৰিলে ৷
Like · Comment ·  · 111

"শূন্যকোঠালীত নিজৰ মাত"

শূন্যকোঠালীটোত
নিজৰেই মাত শুনি
চমকি উঠিল তাই ৷
বিয়াঘৰৰ উদং ৰভাতলীৰ
বেজেৰুৱা হুমুনিয়াহবোৰ
ওপঙি থাকিল
বাহিৰে ভিতৰে ৷
তোমাৰ চকুৰ কোণত
জিলিকিথকা মুকুটাটি
মোৰ হাতৰ তলুৱাত
এইমাত্ৰ সৰি পৰিল৷৷

গল্ফীৰ ডায়েৰী

গল্ফীৰ ডায়েৰী
আমাৰ গাঁৱৰ মোহনৰ কথা কৈ শেষ কৰিব নোৱাৰি৷
এবাৰ মোহনে বাইকৰ পৰা পৰি বেয়াকৈ দুখ পালে ৷ ঘৰত মাকে ভালকৈ বাইক চলাব নাজান’ বাবে বিপদ ঘটাইছ’ বুলি গালি দিলত মোহনে মাকক ক’লে—“গালি পাৰি নাথাকিবাছোন ! বিপদে চিঠি দি আহে নেকি?”
মোহনৰ চকু দুটা বৰ সৰু সৰু আছিল ৷ এদিন দেউতাকে ঘৰৰ ভিতৰৰ পৰা দা খন আনিবলৈ মোহনক পাচিলে ৷ তাৰ পিছে আনি দিবলৈ মন নাই, সেয়ে সি দেউতাকক ক’লে – “চোৱা দেউতা মোৰ চকু দুটা ইমান সৰু , মই দা খন দেখিকে নাপাওঁ,কেনেকৈ আনিম?”
এদিন ৰাতি সি আঁঠুৱাৰ বাহিৰত শুই আছিল ৷ মাকে দেখি মোহনক জগালে আৰু সুধিলে –“তই যে আঁঠুৱাৰ ভিতৰত নুশুই আঁঠুৱাৰ বাহিৰত শুইছ’ কি কথা?”
মোহনে ক’লে – “আঁঠুৱাৰ ভিতৰত ইমান ম’হ! সিহঁতকে তাত শুবলৈ দি মই বাহিৰত শুই আছো !”

গল্ফীৰ ডায়েৰী

মাজনী বাইদেৱে এদিন বেমাৰ দেখুৱাবলৈ ডাক্তৰৰ ওচৰলৈ গ’ল ৷ নিজৰ পাল আহিব আহিব বুলি মাজনী বাইদেউ ডাক্তৰৰ চেম্বাৰৰ বাহিৰত ৰৈ আছে ৷ এনেতে এগৰাকী মহিলাই মাজনী বাইদেউক সুধিলে –“ আপুনি কেই নম্বৰ?” মাজনী বাইদেৱে তপৰাই উত্তৰ দিলে – “মই ঘৰৰ ৫ নম্বৰ ছোৱালী ৷”
মাজনী বাইদেউৰ গাঁৱৰ ইলাকন হঁতৰ ঘৰত থকা টিভিটো বেলেগ মানুহ এঘৰৰ ৷ এদিন মাজনী বাইদেৱে ইলাকন হঁতৰ ঘৰত টিভি চাই আছিল তেনেতে মামণি পেহীয়ে মাজনী বাইদেউক সুধিলে – “ইলাকনহঁতৰ টিভিটো কাৰ ঘৰৰ আছিল ঔ মাজনী ? মাজনী বাইদেউৰ মুখৰ পৰা ফটককৈ ওলাই গ’ল –“ বলৱন সিং হঁতৰ টিউবৱেলটো আকৌ!” মামণি পেহী অবাক ! “বলৱন সিং হঁতৰ টিউবৱেলটো মানে?” মাজনী বাইদেৱে গৰগৰাই হাঁহি ক’লে—“অ’ টিউবৱেলটো নহয়, বলৱন সিঙৰ ঘৰৰ টিভিটো!”

"বাঙ্ময় মুহূৰ্ত্ত"



প্ৰিয় সখীয়ে ক'লে --
"আজি তোমাক মই মোৰ প্ৰিয় চুবুৰীটোলৈ লৈ যাম" ৷
মনটো এনেয়ে সুখানুভূতিৰে ভৰি আছিল তাতে প্ৰিয় সখীৰ প্ৰিয় চুবুৰী; একে উশাহতে ৰাজী হ'লো ৷
এটি নিস্তৰংগ দুপৰীয়াৰ একান্ত নিৰ্জন হ্ৰদৰ পাৰত আমি দুয়ো বহি পৰিলোঁ ৷
বহু দিনৰ সাঁচি থোৱা বহুতো কথাৰে আমাৰ দুয়োৰে হৃদয় ভৰি আছিল৷
নিস্তৰংগ দুপৰীয়াটোৰ নিৰ্জন হ্ৰদৰ পাৰৰ মৌনতাৰ আলাপে সেইদিনা এটি বাঙ্ময় ৰূপ লৈছিল ৷
গছৰ সেউজীয়া পাতবোৰ, হ্ৰদত চৰি থকা হাঁহ কেইজনী সাক্ষী আছিল
আমাৰ সান্নিধ্যৰ বাঙ্ময় মুহূৰ্ত্তৰ ৷৷